சித்தன் அருள் - 1213 - அகத்தியர் மைந்தனுக்கே பரீட்ச்சை!

​வணக்கம் அகத்தியர் அடியவர்களே!

அகத்தியப் பெருமானின் அடிபணிந்து அவர் உத்தரவின் பேரில் செயல்படும் போது, பலவித சோதனைகளுக்கும் அந்த ஒருவரை உட்படுத்தி, அவரை புடம் போட செய்வார். இன்ன இடத்திற்கு வா என அவர் உத்தரவிட்டு நாம் சென்றால், அங்கு சோதனைகள் காத்திருக்கும், அனுபவங்கள் கிடைக்கும், அதற்கும் மேலே நாம் உணராமலேயே நிறைய அளவுக்கு நம் கர்மா கரைந்து போகும்.

ஒரு முறை, அகத்தியர் மைந்தன் திரு.ஹனுமந்த தாசன் அவர்களை சந்தித்த பொழுது, அவராகவே பகிர்ந்து கொண்ட ஒரு அனுபவத்தை இங்கு சமர்ப்பிக்கிறேன்.

அவர் தன்வாழ்க்கையை அகத்தியப்பெருமானுக்கு என அர்ப்பணித்தவர். அவர் அளித்த ஜீவநாடி வழி அருள் வாக்குகளை பெற்று, பலரின் வாழ்வில் அருளை கொடுத்தவர். இருப்பினும், தன் கர்மாவை, பல நேரங்களிலும் அனுபவித்தே கழித்தவர். அகத்தியர் கூட இருக்கிறார் என்பதற்காக கர்மசுமையை அவர் தோளில் இறக்கி வைத்ததில்லை. ஆயினும், தனிமை கிடைக்கும் நேரத்தில் எல்லாம் "ஓம் அகத்தீசாய நம" என மனதுள் ஜபம் செய்து அமர்ந்திருப்பார்.

அவருக்கு தெரியாமலேயே ஒரு இறை சந்திப்பு அகத்தியப் பெருமானுடன் நடந்தது. நாடி வாசிப்பவரின் பெயரில் அமர்ந்துள்ள "ஹனுமான்" அகத்தியப்பெருமானை சந்திக்க நேர்ந்தது. அகத்தியப்பெருமான், ஹனுமந்த தாசனின் கர்மாவை, கோள் நிலைகளின் இருப்புடன் ஒப்பிட்டு பார்த்துக் கொண்டிருந்தார். அவர் கர்மாவின்படி, உடனேயே வரும் அந்த நேரத்தில் இறை கோள்களின் உதவியுடன், அவரை சோதிக்க வேண்டும்.

அகத்தியர் மனதில், இறை, எந்த ரூபத்தில் வந்து, எப்படி சோதிக்கப் போகிறது என்கிற எண்ணம். எதை பற்றியும் கவலை கொள்ளாத தகப்பனாக/குருவாக அவர் இருந்தாலும், தன் மைந்தனுக்கு சோதனை காலம் என்கிற பொழுது, அவரும் சற்று விசனப்பட்டார்.

"ஆசீர்வாதங்கள்! என்ன அகத்தியரே? என்ன சிந்தனை? அதென்ன சிறிய கவலை ரேகை உங்கள் மனதில் ஓடுகிறது?" என்ற படி த்யானத்தில் இருந்த அகத்தியப்பெருமானுக்கு எதிரில் வந்தமர்ந்தார், வாயு புத்திரன்.

தியானத்தை கலைத்து கண் விழித்தவர், தன் முன் அனுமனே வந்து அமர்ந்திருப்பதை கண்டு, ஆச்சரியப்பட்டு "வாருங்கள் ராம தாசனே! நமஸ்காரங்கள் பல. அடியேனுக்கு உங்கள் தரிசனம் கிடைக்க என்ன பாக்கியம் செய்தேனோ? ராமர், சீதா, லக்ஷ்மணன் எல்லோரும் நலம் தானே? அடியேனின் நமஸ்காரத்தை அவர்களுக்கு தெரிவித்து விடுங்கள். தாங்கள் அடியேனை தேடி இதுவரை வந்த காரணத்தை அறியலாமா? சிரமபரிகாரத்திற்கு, அடியேன் என்ன செய்ய வேண்டும்?" என்று வினவினார்.

பாருங்கள் நம் குருநாதர் நடந்து கொள்கிற விதத்தை. ராமனுக்கே, குருவின் ஸ்தானத்தில் இருந்து ஆதித்ய ஹ்ருதயத்தை உபதேசித்தவர். அவர் ராம தாசனிடம், அடியேன் என்று கூறிப்பணிந்து நிற்கிறார்.

"சிரம பரிகாரத்திற்கு எதுவும் தேவை இல்லை. ராமர் சேவைக்காக இவ்வழி சென்று கொண்டிருந்தேன். தாங்கள் த்யானத்தில் அமர்ந்திருந்தாலும், மனதுள் ஏதோ ஒரு யோசனையை போட்டு உருட்டிக் கொண்டிருந்தீர்! அகத்தியன் இப்படி இருக்க மாட்டீரே! என்னவாயிற்று இவருக்கு!" என விசாரிக்கலாம் என்று வந்தமர்ந்தேன்" என்றார், அனுமன்.

"அது ஒன்றுமில்லை! தற்போதைய கர்மா, கோள்நிலை படி என் மைந்தன் ஒருவனுக்கு, இறைவனால், சோதனை வைக்கப் பட உள்ளது. அந்த சோதனை என்ன? யார் வரப்போகிறார்கள்? என் மைந்தன் அந்த பரீட்ச்சையில் வெற்றி பெற்று விடுவானா? என யோசித்துக் கொண்டிருந்தேன்! அந்த யோசனையில், தாங்கள் வருவதை கவனிக்க தவறி விட்டேன்! சற்று மன்னித்து, பொறுத்தருள வேண்டும்" என்றார்.

"அது இருக்கட்டும். இறை சோதனைக்குள்ளாக்கப் போவது, என் தரிசனம் பெற்று தன் பெயரை "ஹனுமத் தாசன்" என மாற்றிக் கொண்டவன் தானே. அவன் உன் மைந்தனா? இல்லையே! அவன் பிறந்த உடனேயே ராமனுக்கு தாரை வார்க்கப்பட்டு, ராமஸ்வாமி என திருநாமம் உரைக்கப் பட்டவன் அல்லவா?" என்றாரே பார்க்கலாம்.

அகத்தியப்பெருமானுக்கு, தன் மைந்தனுக்கு இறை வைக்கப் போகிற சோதனையில் தன்னையும் சேர்த்திட, அவரை சுற்றி ஒரு வலை பின்னப்படுவது புரிந்தது.

பின்னணியில் நடப்பது எதுவும் தெரியாமல் அகத்தியர் மைந்தன் எப்போதும் போல் அனைவருக்கும் நாடி வாசிக்கும் வேலையை செய்து கொண்டிருந்தார்!

ஓம் ஸ்ரீ லோபாமுத்திரா சமேத அகத்தியர் திருவடிகளில் சமர்ப்பணம்!

சித்தன் அருள்...........தொடரும்!