சித்தன் அருள் - 2022 - திரு.ஹனுமந்ததாசனின் கஞ்சமலை வாக்கு - 12 !

சித்தன் அருள் - 2011ன் தொடர்ச்சியாக!

அவன் எந்த உருவத்தில் வந்தாவது உங்களை காப்பாற்ற போகிறான்.

வாக்குறுதி அளித்து விட்டான், அவன் விஸ்வரூபம் எடுத்தும் விட்டான்.

இதுவரை அமைதியாக இருந்து தியானம் செய்து கொண்டிருந்த அவன், இறை நோக்கி செய்து கொண்டிருந்த அவன், இப்பொழுது அவன் அந்த இருக்கையில் இருந்து எழுந்து வந்து, மான் சடையுடுத்தி, மயிலிறகால் மேலே சொரிந்து கொண்டு வெளியே வந்திருக்கிறான் ஆனந்தமாக !

முசுடு என்று சொன்னதற்கு எல்லாம், என்மேல் அவனுக்கு கோபம் தான், என் மேல் வருத்தப்படுகிறான், நான் என்ன முசுடுவா என்று ? என்னை கடிந்து கொள்ளுகிறான். ஆகவே நான் விளையாட்டாகத்தான் சொன்னேன், நான் கோபித்துக் கொள்ள மாட்டான் என்று தான் சொன்னேன். அவன் உண்மையை சொன்னால் அவனுக்கே கோபம் வருகிறது, ஒருவேளை அவனும் மனிதனாக மாறிவிட்டானோ என்று கூட நானும் யோசித்தேன், ஆனால் தட்டி கொடுத்து உண்மையை சொன்னாய், ஆனால் இனிமேல் வாய் திறந்து சிரிக்கிறேன் என்றான்.

நீ சிரிப்பது மட்டுமல்ல, எல்லோரையும் சிரிக்க வை என்றும் சொன்னேன்.

சிரிக்க மட்டுமல்ல அவர்களை சிந்திக்கவும் வைப்பேன், அவர்களுக்கு வேண்டியதை செய்ய போகிறேன் என்று சொன்னான்.

ஏற்கனவே சொன்னேன் சித்தர் காலம் என்று.சித்தர் காலத்தின் முதல் படியை காலாங்கிநாதர் இன்று முதல் ஆரம்பிக்க போகிறார். அவன் சொல்லுகிறான் உங்கள் அத்தனை பேருக்கும், உங்களுக்கு என்ன வேண்டுமோ, எதை வேண்டுமோ ? என்ன வேணாலும் கேட்கலாம், அது ஒரு ஆசை, இதை தான் வேண்டும் என்று கேட்க மாட்டேன் அது உனது விருப்பம், உன் விருப்பத்தை நிறைவேற்றி வைக்க வேண்டியது என் கடமை. ஆகவே காலாங்கிநாதர் துணை கொண்டு, அன்னவனை மனக்கண்ணால் நினைத்துக்கொள், சற்று ஒல்லியான உருவம், உயர்ந்த உருவம், ஆறடி உயரத்திற்கு இருக்கிறான், அவன் ஜடாமுடி ஏறத்தாழ இரண்டு அடிக்கு மேலே இருக்கிறது, கருந்தடி ஒன்று இடுப்பிலே அளவு வரைக்கு இருக்கிறது. அது அக்குள் வரைக்கும் இருக்கிறது. அந்த மரச்செடிக்குள் ஒளிந்து கொண்டிருக்கிறான். கமண்டலம் அவன் கையில் இல்லை. ஆனால் முகத்திலே தீட்சண்யம் இருக்கிறது. 36 லட்சங்களை முகத்திலே அமைதியாக குடிகொண்டிருக்கிறது. இப்படி ஒரு கற்பனை எண்ணிக்கொள். சிவந்த மேனி, அவன் வாய் திறந்து சிரித்தால், அவன் நிச்சயம் செந்தாமரை சிரிப்பது போன்று தோன்றும். சிரிக்க மறுக்கிறான் தவிர, சிரிப்பான் அவன். ஆனால் அவனே இப்பொழுது வாய் திறந்து சொல்லுகிறான், அவன் உருவத்தை இப்பொழுது சொல்லிவிட்டேன், இதை கற்பனையில் செய்து கொண்டு, எந்த பிரச்சனை இருந்தாலும், கை கால் அலம்பி கொண்டு, வடகிழக்கு திசை நோக்கி அமர்ந்து, பிரம்ம முகூர்த்தத்தில் அவனை நோக்கி ஒரு முறை வலம் வா, உனது வேண்டுகோளை, மானசீகமாக பிரார்த்தனை வை, விரைவிலே நிறைவேற்றி தருகிறேன் என்று சொல்லியிருக்கிறான். அவனால் முடியுமா என்று நான் கூட யோசித்தேன், விதிமகளும், பிரம்ம தேவனும் கூட, காலாங்கிநாதன் முன் நிற்க பயப்படுவர்கள். அவனுக்கு மரியாதை கொடுப்பவர்கள். ஆக அப்படிப்பட்ட பிரம்மாவும், விதிமகளும் கூட இன்றைய தினம் வாய்திறந்து காலாங்கிநாதர் என்ன செய்தாலும் செய்யட்டும், அவன் வேண்டுகோளை நிறுத்த, எப்பேர்ப்பட்ட  கொடிய தவறுகள் செய்திருந்தாலும், எப்பேர்ப்பட்ட பாவங்கள் செய்திருந்தாலும், எப்பேர்பட்ட குற்றங்களை தெரிந்தோ தெரியாமலும், அறிந்தோ அறியாமலும்  செய்திருந்தாலும், பக்தியோடு இல்லாமல் பிரார்த்தனை செய்திருந்தாலும், தப்புத்தப்பாக பிரார்த்தனை செய்தாலும், மந்திரம் சொல்லாமலே த்யானம் செய்தாலும், அல்லது மறக்காமல் திட்டினாலும் கூட, அதையும் கூட புஷ்பமாக எண்ணிக்கொண்டு, அவர்களுக்கு உதவி செய்ய வருகிறேன் என்கிறான். ஆக இன்று முதல் உங்களுக்கு காலாங்கிநாதர் உங்கள் வேண்டுகோளை நிறைவேற்ற சரியாக செயல்பட தயாராகிவிட்டான். அதாவது அவன் விஸ்வரூபம் எடுத்து விட்டான்.அவன் விஸ்வரூபம் எடுத்தால் என்ன நடக்கும் என்று எனக்கு தெரியும். ஆக விஸ்வரூபம் என்பது கோபத்தால் அல்ல, அன்பால், பண்பால் அவன் இறங்கி வந்திருக்கிறான். இதனை ஆண்டு காலம், ஒதுங்கி இருந்ததை விட்டுவிட்டு, இன்றைய தினம் புதியதோர் உலகத்தை படைப்பது போல, ஆர்வத்தோடு எழுந்து வந்திருக்கிறான்.

அவனுக்கு உங்களுடைய அன்பு, உங்கள் பாசம், உங்களுடைய பிரார்த்தனை எல்லாம் ஆச்சர்யமாக இருக்கிறது, ஆனந்தமாக இருக்கிறது. ஆக அவன் அகத்தியனை விட பன்மடங்கு பலசாலி, எதையும் செய்யக்கூடியவன். அகத்தியன் சற்று யோசித்துதான், அவனுடைய கர்மவினையையும் யோசித்து பார்த்து, எல்லோருடைய கோபத்துக்கும் ஆளாகாமல், நடுநிலையாக செயல்படுபவன் எண்ணியெண்ணி செயல்பட்டு கொண்டிருக்கிறேன். இதில் கூட தவறு இருக்கலாம். அனால் காலங்கிநாதன் சற்று பிடிவாதக்காரன். அவன் சண்டை போடக்கூடியவன். ஒருமுறை சிவனையே கையை பிடித்து இழுத்து, என் வேண்டுகோளை ஏன் மறுக்கிறாய்? என்று உரிமையோடு கேட்டான். செல்லமாக சிவபெருமான் கன்னத்தை தட்டி, அந்த உரிமை கூட அவனுக்கு இருக்கிறது. சிவபெருமான் கூட இதுவரைக்கும் அவன் மீது எந்த ஆத்திரமோ, கோபமோ கொண்டதாக தெரியவில்லை.

அப்படிபட்டவன் உங்களுக்காக, உங்கள் வேண்டுகோளை ஏற்று செயல்படுவதற்காக இன்றைய தினம் எழுந்து வந்திருக்கிறான்.

அவனை எப்படி பயன்படுத்த வேண்டுமோ, அப்படி பயன்படுத்தி கொள்வது உங்கள் கடமை. அதை தான் அகத்தியன் முடிக்கிறேன்.

ஓம் ஸ்ரீ லோபாமுத்திரா சமேத அகத்தியர் திருவடிகளில் சமர்ப்பணம்!

சித்தன் அருள்.....தொடரும்!