சித்தன் அருள் - 1874 - அன்னதானம் - அகத்தியப்பெருமானின் செய்தி!

வணக்கம் அகத்தியர் அடியவர்களே!

சமீபத்தில் அகத்தியப்பெருமானுடன் நாடியில் உரையாடும் வாய்ப்பு கிடைத்து, நீங்கள் அனுப்பிய கேள்விகளுக்கு விடை பெற்றது நினைவிருக்கும்!

அந்த உரையாடலின் பொழுது, நிறைய விஷயங்கள் பேசப்பட்டது. நீதி, நேர்மை, நியாயம், தர்மம், அதர்மம் போன்ற தலைப்பில் பலவிதமான கேள்விகளை அடியேன் எழுப்பினேன். பேசிய பல விஷயங்களை சித்தன் அருளில் வெளியிடவே இல்லை. ஆனால் ஒரு தலைப்பைப் மட்டும் வெளியிட்டு, அனைவரையும் தெரிவித்து விடலாம் என சில நாட்களாக தோன்றிக் கொண்டே இருந்தது. ஆகவே, அவர் கூறியதை அடியேன் புரிந்து கொண்ட வரையில் இங்கு தெரிவிக்கிறேன். இது "அன்னதானம்" செய்வதை பற்றிய விளக்கம்!

பொதுவாக சித்தர்கள், குறிப்பிட்ட நாட்களில், குறிப்பிட்ட இடங்களில் அன்னதானம், நீர் மோர் போன்றவை அங்கு வரும் பக்தர்களுக்கு பலர் பங்குபெற்று, பொருள், பண உதவியுடன் உடல் உழைப்புடன் அடியவர்கள் செய்வது வழக்கம். இதில்  அறிந்தவர்கள் முதல், முகமறியாத, தூரத்தில் வசிக்கும் அடியவர்கள் பங்களிப்புடன், இந்த தானத்தை செய்வது உண்டு. நிற்க! இனி உரையாடலுக்குள் செல்வோம்!

அடியவர்: சித்தர்கள் கூற்றுன்படி, அவர்கள் வழிகாட்டுதலுடன் பல இடங்களில் இறைவனை தொழ வருகின்ற  அடியவர்கள், பசியுடன் திரும்பி செல்லக்கூடாது என்கிற நல்ல எண்ணத்தில், அடியவர்களின் பசியக்கற்றும் விதமாக, இறை, சித்தர்கள் அனுமதி, ஆசீர்வாதத்துடன் அன்னம் அளிக்கப்பட்டது. அனைத்திலும் ஓடி ஓடி பங்கு பெற்ற என்னை, இறைவன்/சித்தர்கள் ஏன் நொண்டி/ஊனமுற்றவனாக ஆக்கினார்கள்? இதற்கு தாங்கள் விடை அளிக்க வேண்டும்!

அகத்தியர்: என்ன வென்று கூற? இறைவனுக்கு என்று வைக்கப்பட்ட உணவை நீ உண்டாய்! அதன் தண்டனை தான் இது!

அடியவர்: அதெப்படி? எனெக்கென தனியாக எதுவும் தயார் செய்து உண்ணவில்லையே. அடியவர்கள் கூட அமர்ந்து, அவர்களுக்கு கொடுப்பதை தானே உண்டேன். மூன்று நான்கு நாட்கள் மலை மேல்/காட்டுக்குள் வருகின்றவருக்கு உணவளிக்க பங்கு பெறுகிற நான் எப்படி உண்ணாமல் இருக்க முடியும்? மட்டுமல்ல, அடியவர்களுக்கு உணவளிப்பதே முதன்மையானது என்று சித்தர்கள் கூற அவர்களைத்தான் கவனித்தோம். இதில் இறைவன் எங்கு வந்தார்?

அகத்தியர்: நீங்கள் கை நீட்டி வாங்கிய ஒவ்வொருவனும் என்னென்னவோ செயலை செய்து சம்பாதித்துவிட்டு, அன்னதானத்துக்காக கொடுத்து தன் கெட்ட கர்மாவை கழித்துக் கொள்ளலாம் என்று கொடுத்த பணத்தில் தான் நீயும் உண்டாய், அவன் கர்மாவை நீயும் வாங்கிக்கொண்டாய்.

அடியவர்: கெட்டவன் கையில் வாங்குகிற பணம் (தெரிந்தோ/தெரியாமலோ) அன்னதானத்துக்கு உபயோகப்படுத்தினால், மிகப்பெரிய தண்டனையை அனுபவிக்க வேண்டி வருமென்கிற உண்மையை இதுவரை நீங்கள் யாரும் கூறவில்லையே. மட்டுமல்ல, பத்து பேரிடம் பிச்சை எடுத்து, இயன்றவரை அன்னம் பாலித்தால், இப்படி கர்ம பரிவர்த்தனை வருமென்ற உண்மையை நீங்கள் கூறவில்லையே. இது யாருடைய தவறு?

அகத்தியர்: அப்படித்தான் அனுபவிக்க வேண்டும் என்கிற விதி இருந்தால், அனுபவித்துத்தான் ஆகவேண்டும்.

அடியவர்: சித்தர்கள் வந்து கூறுகிற தெளிவில்லாத/நிறைவு பெறாத வார்த்தைகளால் கவரப்பட்டு, ஏதோ ஒன்றை மனிதன் செய்யப் போய், அடிவாங்கி சிதறுபவர்களை தான் இன்று பார்க்க முடிகிறது. என் சேய்கள் என்று கூறுகிற அகத்தியப்பெருமானுக்கு கூட, தன் மைந்தன் சரியாக புரிந்து கொண்டு, சரியாக செயல் படுகிறானா என்பதை கவனிக்கிற கடமை என ஒன்று உள்ளதா?

அகத்தியர்: சித்தர்கள் நாங்கள் சரியாகத்தான் வழி நடத்துகிறோம். மனிதன் தான் வழி தவறி செல்கிறான், காசுகள் சேர்க்க வேண்டும் என்கிற எண்ணத்தில். ஒரு விதத்தில் பார்த்தால் சித்தர்கள் எங்களையே வியாபாரப் பொருளாக மாற்றி விடுகிறார்கள்.      

சித்தன் அருளை வாசிக்கிற எத்தனையோ பேர்கள் அன்ன தானத்தை மிகுந்த ஈடுபாட்டுடன் செய்கிறீர்கள். இந்த உண்மை தெரிந்தபின், நமக்கு இது தேவையா என்று உங்களுக்கு தோன்றலாம். என்ன நடந்தாலும் நடக்கட்டும் என்று முன்னே செல்பவர்களுக்கு, மிகுந்த ஆபத்திலிருந்து தப்பிக்க ஒரு வழி, 

இந்த மாதிரி நிகழ்ச்சிகளில் கலந்து கொள்ளும் போது, எந்த காரணத்தாலும், அன்னதானத்தை வாங்கி உண்ணாதீர்கள். யார் கர்மா எப்படி உங்கள் வாழ்வில் புகுந்து விளையாடும் என்று தெரியாது.

நீங்கள் உழைத்து சம்பாதித்த பணத்தை கையில் வைத்துக் கொண்டு, அதில், அந்த நேரத்தில் வெளியிலே உண்ணுங்கள்.

இது ஒன்றுதான் தப்பிக்க, அடியேனுக்கு தெரிந்த வழி!

ஓம் ஸ்ரீ லோபாமுத்திரா சமேத அகத்தியர் திருவடிகளில் சமர்ப்பணம்!

சித்தன் அருள்.....தொடரும்!