சித்தன் அருள் - 1245 - அகத்தியர் அருள்வாக்கு - 1

​வணக்கம் அகத்தியர் அடியவர்களே!

குருநாதருடன் நாடியில் பேசியபோது கிடைத்த அருள்வாக்கு!

எம் வழியில் வருபவர்கள், கீழ்கண்டவைகளை உணர்ந்து செயல்பட வேண்டும்.

சித்தர்கள் வாக்கில் உண்மையே இருக்கும். சித்தர் உரைத்திருந்தால் அது நிச்சயமாக நடக்கும். நடக்கும் வரை பொறுமை தேவை.

எம் வாக்கில், இருபொருள், முப்பொருள் இருக்கும். ஆகவே சேய்கள் எம் வாக்கை உன்னிப்பாக கவனித்து, உள்வாங்கி, உணர்ந்து அதன் படியே செயல் பட வேண்டும். ஒருவன் கர்மா படி அவனே முடிவெடுத்து செயல் படட்டும் என்றுதான் இரு பொருள். முப்பொருள் கொண்ட வாக்கை உரைக்கின்றோம். தீர்மானிப்பதும், செயல்படுவதும், அதன் பலனை அனுபவிப்பதும் அந்த ஒருவன்தான்.

ஒரு செயலை, சித்தன் உரைத்ததை விட மேன்மையாக செய்தால், நாங்களே அடிக்கடி இறங்கி வந்து மேலும் நிறைய இறை சேவை செய்ய வாய்ப்பளிப்போம்.

சித்தனுடன் அமர்வது, அவர்களின் அருகாமை என்பது இறைவன் பாதத்தில் அமர்வதற்கு சமம்.

அவசர புத்தி, எதிலும் ஆபத்து. நிதானமும், கவனமும் ஒரு பொழுதும் இழக்ககூடாது.

இறைவனும், சித்தர்களும் உன்னை தேடி வரும்படி வாழ்க்கையில் நடந்து கொள்.

சித்தன் பார்வையே கர்மாவை சிதறடிக்கும்.

சித்தனிடம் வந்தால் வாங்கி வந்த கர்மாவை முதலில் அனுபவிக்கவிட்டு கரைத்து, பின்னரே எம் வழியில் சேர்ப்போம். அது எம் மைந்தனாக இருந்தாலும் சரி. பாரபட்சம் கிடையாது.

மனிதன் என்றாலே, கர்மாதான்.

சித்தன் என்றாலே இறைவனின் தூதுவர்கள். நேரமும், வெளிச்சமும் அவர்களுக்கு பொன்போன்றது. இதை முதலில் உணர்ந்து செயல்படுங்கள்.

நீ சம்பாதித்த சொத்து உன் கர்மாவைத்தான் கூட்டவோ குறைக்கவோ செய்யும். இறைவனுக்கும்/சித்தர்களுக்கும், உன் இதயத்தை தவிர வேறு எதுவும் தேவை இல்லை.

நல்ல செயலை செய்வதானால், உடனேயே செய்துவிடு. கெடுதலை செய்ய ஒரு போதும் நினைக்காதே.

எங்கும், எதிலும் தொடர்பு வைத்தால், கர்மா பங்கு வைக்கப்படும்!

மௌன விரதம் என்பது பேசாமல் மட்டும் இருப்பதல்ல, உள்ளே எந்த சிந்தனையும் இல்லாமல் இருப்பது.

ஏமாற்றுபவன் உன்னை பதட்டமடைய செய்து வெற்றி பெறுகிறான். உன்னிப்பாக கவனித்து நடந்து கொண்டால் இழப்பு இருக்காது.

இறைவன் ஏகன்/அனேகன், அதை முதலில் உணருங்கள்.

ஓம் ஸ்ரீ லோபாமுத்திரா சமேத அகத்தியர் திருவடிகளில் சமர்ப்பணம்!

சித்தன் அருள்.....தொடரும்!