சித்தன் அருள் - 2348 - சித்தர் புலம்பல்கள் - 10 !

வணக்கம் அகத்தியர் அடியவர்களே!

"சித்த மார்கத்தில்" நுழைந்து கவனித்த பொழுது, பல நேரங்களில் சித்தர்கள் உதிர்த்த அறிவுரைகள், உங்கள் அனைவருக்காக!

1. பெண்களுக்கு உண்டாகும்  பிரச்சினைகளுக்கும், ஆண்கள் மனோ தைரியம் இல்லாதிருப்பதும் , ஒன்றை நினைத்து சதாசர்வ காலம் கவலைப்படுவதும், தைரியம் இல்லாமல் இருப்பது  போன்றவை விலக, அவரவர் பிறந்த நட்சத்திரத்தன்று சப்த கன்னிமார்களுக்கு உயர்வான அபிஷேகம் ஆராதனை செய்து வந்தால் நலம்.
2. அறம், சத்தியம் விடாது கடைபிடித்தல் வேண்டும்.
3. எக்காலமும், எக்காரணம் கொண்டும் இறை நம்பிக்கைக்கு எதிரான நம்பிக்கையை வளர்த்தல் கூடாது.
4. அனைத்தும் இறையின் படைப்பு, அனைத்திற்கும் இறையே பொறுப்பு.
5. எங்கெல்லாம் தர்மம் நடக்கிறதோ, யாருக்கெல்லாம் தர்மத்தின் மீது நம்பிக்கை இருக்கிறதோ, யாருக்கெல்லாம் எத்தனை துன்பத்திலும் தர்மத்தை விடக்கூடாது என்று எண்ணம் வருக்கிறதோ, சத்தியத்தை விடக்கூடாது என்ற நம்பிக்கை இருக்கிறதோ, அவனெல்லாம் அகத்தியரின் சிஷ்யர்கள். அதனையும் தாண்டி அகத்தியரின் சேய்களே! 
6. உடனடி லாபம், ஆதாயம் பெற தீய வழியில் செல்லக்கூடாது.
7. நன்மையை கருதி கூறப்படும் சத்தியத்துக்கு மாறான விஷயங்கள், பாவமாக கருதப்படாது. அது சுயநல நன்மையாக இருக்கக்கூடாது, பொதுநல நன்மையாக இருக்க வேண்டும்.
8. மனம் பக்குவம் அடைந்தபின், ஒரு கட்டத்தில் ஒன்றும் இல்லாத வெறுமை வரும். அதனுள் உள்ள ஒரு வெற்றிடம் தான் மகா சக்தி, பூரண சக்தி.
9. இறை நம்பிக்கை இல்லாவிட்டாலும் பரவாயில்லை, தர்ம குணமும் பிறருக்கு உதவும் குணமும் இருந்துவிட்டால் போதும், அவன் இறையை தேட வேண்டியதில்லை, இறை இவனை தேடி வந்து விடும்.
10. இறை அருள் இருப்பவனுக்குத்தான் பிறருக்கு உதவ வேண்டும் என்கிற எண்ணம் வரும்.
11. எவன் ஒருவன் அதிக அளவு தர்மம் செய்கிறானோ, அவனிடம் இறையே கை ஏந்தும்.
12. விதி மழையாய் பெய்யும் பொழுது, ஒருவன் நனையாமல் தன்னை காத்துக்கொள்ள சித்தர்கள் காட்டும் வழிபாடு முறைகள், குடையாக அமையும்.
13. எல்லா மனிதரிடமும், நல்லன, நல்லன அல்லாதவை போன்ற குணங்கள் இருக்கின்றது. இருந்தாலும், பூர்வீக தோஷங்களை களைந்து, தன் முனைப்பில்லாமல் இறைவனை நோக்கி செல்ல கூறுகிறோம்.
14. சித்தர் வாக்கை நாடியில் ஒதுகிறவனுக்கு பராக்கிரமமோ, ஞான நிலையோ, ஓதுவதால், வந்துவிடாது. எமது வாக்குகளை கேட்டு, 100% நடைமுறைப் படுத்துபவனுக்கு ஒரு வேளை சிறிது ஞானம் வரலாம்.
15. தான் செய்கிற பூஜைக்கு யாரும் இடையூறு செய்யக்கூடாது என்று எதிர்பார்க்கின்ற ஒருவன் தான் செய்கிற பூஜையும், பிறருக்கு எந்த விதத்திலும் இடையூறாக இருக்க கூடாது, என கவனிக்க வேண்டும்.
16. மனம் திடம் பெறத்தான் மந்திரம் உரைக்க சொல்கின்றோம். மனதின் திறம் உயர்த்துவதே மந்திரம் ஆகும்.
17. மனதை ஒரு நிலை படுத்தி மந்திரம் உருவேற்றுவதே நலம்.
18. அகமும், முகமும் மலர உள்ளே மந்திரம் உருவேற்றப்பட வேண்டும்.
19. பரிகாரங்களை விட, மனம் ஒன்றிய பிரார்த்தனைகள்  அதிகம் சக்தி வாய்ந்தவை.
20. ஆத்மார்த்தமான பக்தி இருக்கும் இடத்தில், புற சடங்குகள் முக்கியமில்லை.
21. ஒரு மனிதன் செல்ல வேண்டியது, மிருக-மனித-மாமனித-மா/மா மனித-கந்தர்வன்-தேவன்-மகான் என்ற நிலைகளே!
22. மகான்களின் தொடர்பு உள்ளது என்பதால், ஒரு மனிதனுக்கு துன்பங்கள் வராது என்பதற்கில்லை.
23. வடிவத்தில் மனதை லயிக்கவிட்டு, பிறகு வடிவமற்ற பூரணத்தை உணர்வதே மெய்ஞ்ஞானமாகும்.
24. ஓர் ரூபம், ஓர் வடிவம், ஓர் நாமம் இல்லாதான் பரம்பொருள்.
25. பரிபூரண சரணாகதியை, மனம், வாக்கு, காயத்தால் எவன் ஒருவன் பரம்பொருளிடம் சமர்ப்பிக்கிறானோ, அவனுக்கே சாயுச்சம், சாய்ரூபம், சாய்லோகம், சாமீபம் போன்ற நிலைகள் அமையும்.
26. இப்பிறவிக்கு தாய் தந்தை தெரிந்திடினும், எப்பிறவிக்கும் தாய் தந்தை இறைவன் தான்.
27. ஏமாற்றுபவன் கெட்ட கர்மாவை சேர்த்துக் கொள்கிறான். இழப்பவன் சுமந்து வந்த கெட்ட கர்மாவை இழக்கிறான். 
28. செல்வம் சென்று கொண்டே இருக்கவேண்டும், தான தர்மத்துக்கு.
29. செல்வம் வாழ்வதற்கு மட்டுமல்ல, கர்மாவை அழிப்பதற்கும்தான் ஒருவனுக்கு அளிக்கப்படுகிறது. கர்மாவை மேலும் கூட்டிக்கொள்வதா, குறைத்துக் கொள்வதா என்பது அவனவன் தீர்மானம்.
30. ஆத்மார்த்தமாக ஒன்றை செய்தால், அதன் தாத்பர்யம் நினைத்து செய்தவரை சென்றடையும்.

ஓம் ஸ்ரீ லோபாமுத்திரா சமேத அகத்தியர் திருவடிகளில் சமர்ப்பணம்!

சித்தன் அருள்.....தொடரும்!