வணக்கம் அகத்தியர் அடியவர்களே!
"சித்த மார்கத்தில்" நுழைந்து கவனித்த பொழுது, பல நேரங்களில் சித்தர்கள் உதிர்த்த அறிவுரைகள், உங்கள் அனைவருக்காக!
- உணவை மனிதன் உண்ண வேண்டும். எந்த உணவும் மனிதனை உண்ணக் கூடாது.
- உணவு எனப்படும் இரை சரியாக இருந்தால், மாற்று இரை தேவையில்லை. அஃதாவது மாத்திரை தேவையில்லை என்பது உண்மையாகும்.
- அன்னம் இறைவன் கரத்தால் கொடுக்கப்படுகிறது. அதனிடம் மிகுந்த பவ்யம் வேண்டும்.
- மனித உணவுக்காக படைக்கப்பட்டது தானியங்கள் மட்டுமே.
- ஒரு மனிதன், செய்கின்ற வினையை நல்வினையாய் செய்துவிட்டுப்போ, என்பதே சித்தர்களின் வாக்கும், எண்ணமும்.
- ஒரு குடும்பத்தில் ஏற்படும் துர்மரணம், அவ் குடும்பத்தில், கடினமான ப்ரம்மஹத்தி தோஷம் உள்ளது என்பதற்கு சான்று.
- சித்த வழி தொண்டு செய்க, அவ்வழியில் இறையை காண்க.
- மனதை பெரும் முயற்சி செய்து அடக்கவே, சிறு முயற்சியாய் தினமும் பூஜை செய்ய வேண்டும்.
- சித்தர்கள் வாக்கை எளிமையாக எடுத்துச் சொல்லியும், உறவு, சுற்றம், நட்பு உணரவில்லை என்றால், அமைதியாக விலகி வந்து விடு. உனக்கு சித்தர்கள் வழி கைவல்யமாகப் போகிறது, அவர்களுக்கு இறை அனுமதிக்கவில்லை என்று அர்த்தம்.
- ஒவ்வொருவருக்கும் ஒவ்வொரு வழி இறை வைத்திருக்கிறது, நீ உன் வழியை புரிந்து சென்றுவிடு.
- சித்தர்களை வணங்குவோர், நிறை குடம் தளும்பாது என்றிருக்க வேண்டும்.
- எவன் எப்படி வாழ்ந்தாலும், அதை கவனத்தில் கொள்ளாது, உண்மையை நன்றாக ஆய்ந்து, உணர்ந்து, சிந்தித்து பேசி , உள்ளதை கூறி, நல்லதை செய்து வாழும்கால், நலம் தொடரும்.
- ஒரு மனிதன் உழன்று, சிதிலப்பட்டு, பக்குவப்பட்டு, வேதனைப்பட்டு, கவலைப்பட்டு கஷ்டப்பட்டு தன்னை தானே மேம்படுத்திக் கொள்ள வேண்டும் என்பதுதான் இறையின் எண்ணம்.
- ஒரு மனிதன், உள்ளதை உள்ளபடி கூறி வாழுங்கால் என்றென்றும் வெற்றியும் தன்னம்பிக்கையும் உண்டாகும். உள்ளதை கூறாது, அல்லதை கூறுங்கால் தொடர்ந்து பாப சேற்றிலே ஆழ்ந்து ஆழ்ந்து துன்பப்பட நேரிடும்.
- எவன் எப்படி வாழ்ந்தாலும் அது குறித்து கவனம் செலுத்தாது உண்மையை நன்றாக ஆய்ந்து, உணர்ந்து, சிந்தித்து பேசி உள்ளதை கூறி, நல்லதை செய்து வாழுங்கால் நலம் தொடரும்!
- பூர்வ ஜென்மத்து கர்மவினைகளுக்கு உண்டான மதிப்பெண்ணாகத்தான் இந்த வாழ்க்கையில் அனைத்தும் ஒரு மனிதனுக்கு கொடுக்கப்பட்டுள்ளது. இந்த ஜென்மத்து கர்மாவுக்கான பலன்கள், பின்னர்தான் கொடுக்கப்படும்.
- ஓரளவு நல்ல ஆத்மா கால போக்கிலே தான் திருந்துவான் என்றால், அவன் போக்கிலே போகவிட்டு பின்னர் தான் சித்தர்கள் உணர்த்தி திருத்துவார்கள்.
- ஒரு மனிதன் ஆன்மீகத்தில் நுழைந்து பல விஷயங்களை செய்தாலும், பிற மனிதர்களோடு தொடர்பு கொள்ளும் பொழுது, அந்த மனிதனின் மனம் புண்படாமல், வார்த்தைகளை பயன்படுத்த கற்றுக்கொள்ள வேண்டும். இதுவே ஆன்மீகத்தின் முதல் பாடம்.
- எந்த மனிதனிடம், தேவை இல்லாமல் விவாதம், அபவாதம் போன்றவற்றை செய்து மன வேதனையை கொடுக்கிறானோ, அவனுக்கு, இவனின் அனைத்து புண்ணிய பலன்களையும் இவன் இழக்கிறான்.
- மௌனம் புண்ணிய விரயத்தை தடுக்கும்.
- மனம் உவந்து, மனமார, மனம் ஆறுதல் பெற செய்யும் காரியத்தில் தான் புண்ணியம் வரும்.
- ஒரு மனிதனுடைய பொருளை வேறொருவன் பறித்து செல்லும் பொழுதும், இழக்கும் பொழுதும், அவனுக்கு புண்ணியம் வருவதில்லை, மாறாக கர்மா கழிகிறது என்று பொருள்.
- ஒரு வார்த்தை இவன் பேசமாட்டானா என்று பிறர் எங்கும் வண்ணம், வார்த்தைகளை குறைத்தே பயன்படுத்த வேண்டும்.
- ஒரு மனிதனை பக்குவப்படுத்துவது என்பது ரசவாதத்தை விட மிக கடுமையானது.
- ஒரு மனிதன் தன் கடமையை ஆற்றுவதோடு, உடலுக்காக உழைப்பதோடு, உள்ளிருக்கும் ஆத்மாவிற்காகவும் உழைக்க வேண்டும். மனிதப்பிறவியின் உண்மையான நோக்கம் அதுதான்,
- ஒரு மனிதன் பிறனை மன்னிக்க கற்க, சித்தர்கள் அத்தனை வாக்கு உரைத்தும் ஒன்றையும் நடைமுறை படுத்தமாட்டார்கள் என்று உணர்ந்து, மனிதரை மன்னித்து மீண்டும் மீண்டும் வாக்கு உரைக்கிறோமே, அதை கண்டு படிக்க வேண்டும்.
- ஜுரஹரேஸ்வரர் லிங்கத்தை எங்கு கொள்கலத்தில் வைத்து பூஜா செய்கிறார்களோ, அதில் 12 நாழிகை தூய நீரை தேக்கி வைத்திருந்து பின் வெளியேற்றினால் காய்ச்சல் நன்றாக குறையும். அந்த நீரை சோதித்தால், அது அனலாக கொதிக்கும்.
- ஒரு நிலையை அடைந்த பிறகு, ஒருவனுக்குள் இருந்து செயல்படுவது பரம்பொருள் தான்.
- மலை ஏறி இறங்கும் பொழுது தேக அசதி, சோர்வை பொறுத்து சில கர்மாக்கள் குறையும். அதோடு மனம் ஒன்றி அங்கு இறைவனை வழிபட, அவன் கர்மாக்கள் குறைய வாய்ப்புண்டு.
- அதிரூப இறைவன் காட்சிகளை மஹான்களின் காட்சிகளை முழுமையாக அல்ல, ஓரளவு பார்த்தாலே, விழியில் பார்வை குறைவு ஏற்படத்தான் செய்யும்.
ஓம் ஸ்ரீ லோபாமுத்திரா சமேத அகத்தியர் திருவடிகளில் சமர்ப்பணம்!
சித்தன் அருள்.....தொடரும்!
அகத்தீசாய நம நன்றி அய்யா 🙇🏽♂️🙏🏽
ReplyDelete