சித்தன் அருள் - 1437 - அகத்தியப்பெருமானுடன் ஒரு சில அனுபவங்கள்!

வணக்கம் அகத்தியர் அடியவர்களே!

அகத்தியப்பெருமான் காட்டுகிற வழியில் நடந்து செல்கையில், அடியேனின் வாழ்க்கையில் சமீபத்தில் சந்தித்த சில நிகழ்ச்சிகளை உங்கள் அனைவருக்கும் "ஓர் உயர்ந்த பாடமாக" தெரிந்து கொள்வதற்காக கீழே விவரிக்கிறேன்.

பல முறை நாடியில் அகத்தியப்பெருமானை சந்தித்து, பலவிதமான கேள்விகளை கேட்டு, அதற்கு அவர் கூறிய பதிலை உங்கள் முன் சமர்பித்திருக்கிறேன். சமீபத்தில், மதுரையில் ஒரு அடியவரின் வீட்டில் அகத்தியப்பெருமான் பொதுவாக்கு கொடுத்ததை கவனிக்கிற சாட்சி பூதமாக அமர்ந்திருந்தேன். திரு,ஜானகிராமன் அகத்தியப்பெருமானின் ஜீவநாடியை வாசித்தார். அடியவரின் வீட்டில் எங்கும் நிற்க இடமின்றி நிரம்பி வழிந்த கூட்டம். அடியேன், சற்று முன்னரே வந்ததால் ஒரு ஓரத்தில் அமைதியாக அமர்ந்து பலரும் கேட்கிற கேள்விகளையும் அதற்கான அழகான பதிலையும் கவனித்துக் கொண்டிருந்தேன். ஒரு தாய் செல் போனில் தன் மகனை தொடர்பு கொண்டு, "உடனே வா! அகத்தியர் நாடியில் வாக்கு கொடுக்கிறார்! உனக்கும் கேட்க வேண்டும் என்று சொன்னாயே!" என்று அழைத்தார்.

அலுவலகத்தில் வேலை பார்த்துக் கொண்டிருந்த மகன், 15 நிமிடத்தில் நாடி வாசிக்கும் இடத்திற்கு வந்தார். உள்ளே வர இடமின்றி வெளியே நின்ற அவரை, அந்த தாயானவள், பலரை விலகச்சொல்லி வழி கேட்டு மகனை நாடியின் அருகில் அழைத்து சென்று அமரச் சொன்னார்.

இவர் சென்று அமர்ந்ததும், நாடியில் வேரொருவருக்கு  வாக்குரைத்துக் கொண்டிருந்த அகத்தியப்பெருமான் அதை நிறுத்திவிட்டு,  ஜானகி ராமனுக்கு நாடி வழியாக உத்தரவிட்டார்.

"தற்போது எம் முன்னே அமர்ந்த மகனை எழுந்து பின்னாடி கடைசியில் போய் நிற்கச்சொல்" என்றார். அதை ஜானகி ராமன் கூறியதும், ஒரு நிமிடம் அந்த அறையே அமைதியாயிற்று, மொத்த கூட்டமும், யார் அவன் என்று நோக்கிற்று. வேகமாக வந்து அகத்தியர் முன் அமர்ந்தவன், எழுந்து, "ஏன்க?" என்று நின்று கொண்டே கேட்டார். அவரின் தாயும் அமர்ந்திருந்த அனைவரும் ஜானகிராமன் வாசித்து கூறப் போகும் பதிலுக்காக காத்திருந்தனர். அடியேனும்!

"நீ! ஒரு உயிரை கொன்று தின்றிருக்கிறாய்!" என்றார் அகத்தியர்!

"இல்லை, இன்று நான் அசைவம் சாப்பிடவில்லை" என்றான் அவன்.

"இன்று சாப்பிட்டாய் என்று நான் கூறவில்லை. நேற்று இரவு உயிரை கொன்றதை உண்டாய்!" என்று தீர்க்கமாக அகத்தியப்பெருமான் கூறினார். மேலும் "நீ யாம் கூறியபடி சற்று விலகியே நில்!" என்றார்.

அடியேனுக்குள் கோபம் பயங்கரமாக பொங்கியது. என்ன தைரியம் இருந்தால், அசைவம் உண்டுக்கொண்டு, ஒரு மிகப்பெரிய சித்தரிடம், "என் வாழ்க்கை நல்லபடியாக அருள் புரியுங்கள்" என்று கேட்கத் தோன்றுகிறது? அகத்தியப்பெருமானை இவர்கள் போன்றவர்கள் வெறும் சோதிடனாக நினைத்து விட்டார்களா? இவனையும் இவன் குடும்பத்தையும் ஒரு சித்தர் சபிக்காமல் விட்டதே மிகப்பெரிய பாக்கியம். என்ன மாதிரியான மனிதர்கள் இவர்கள்.

அனைவருக்கும் வாக்கு கொடுத்த பின் கடைசியில் அகத்தியப்பெருமான் இவனிடம், "முதலில்  ஒரு உயிரை கொன்று தின்பதை நிறுத்திவிட்டு வா! பிறகு வாக்குரைக்கிறேன்" என்று மறுத்துவிட்டார்.

"சரிங்க! நிறுத்திவிடுகிறேன்!" என்று உறுதியளித்த மனிதன் அடுத்து ஒரு கேள்வியை கேட்டான் பாருங்க! நானே ஆடி போயிட்டேன்!

"எங்க வீட்டுல ரெண்டு வயசு பாப்பா இருக்குங்க! அதுக்கு உடம்பு தேறுவதற்கு டாக்டர் தினமும் ஒரு முட்டை கொடுக்க சொல்லியிருக்காங்க! அது மட்டுமாவது கொடுக்கலங்களா?" என்றான்.

இப்படிப்பட்ட மனிதனுக்கெல்லாம் வாக்குரைக்க வேண்டியுள்ளதே என்று அகத்தியப்பெருமான் நினைத்திருப்பார்!

"உயிர் கொலை புரிவது தவறு என்கிறோம்! அதெப்படியாப்பா, இது சரியாகும்? என்று யோசி" என உரைத்து வாக்கை முடித்துக் கொண்டார்.

சித்தன் அருளில் எத்தனையோ வருடங்களாக அரிய வாக்குகளை அகத்தியரின் அருளோடு உங்களுக்கெல்லாம் சமர்பித்துள்ளேன். அத்தனையும் படித்துவிட்டு, "அகத்தியருக்கு என்ன தெரியப்போகிறது!" என்று இன்னமும் பலவிதமான தவறுகளை செய்யும், அகத்தியப்பெருமானை/மற்ற சித்தர்களை இன்னமும் மறைமுகமாக திட்டிக் கொண்டிருக்கும் நன்றி கெட்ட மனிதர்கள் அனைவருக்கும் இந்த தொகுப்பு சமர்ப்பணம்! சித்தன் சாபத்துக்கு பரிகாரம் கிடையாது. வேறு வழியை பாருங்கள்! உண்மையாக இருந்தால், அகத்தியப்பெருமான் சூழ்ந்து நின்று காப்பாற்றுவார் என்பதற்கு அடுத்த அனுபவம் ஒரு எடுத்துக்காட்டாக இருக்கும்!

ஓம் ஸ்ரீ லோபாமுத்திரா சமேத அகத்தியர் திருவடிகளில் சமர்ப்பணம்!

சித்தன் அருள்.....தொடரும்!