சித்தன் அருள் - 1159 - அகத்தியர் விஜயம் - குருவுடன் இரு நாட்கள்!

அவர்: ஜாதகத்தில் ஆறாம் இடத்தில் நல்ல கிரகங்கள் அமர்ந்தால் என்ன பலன் என்று கூறு?

நண்பர்: ஆறில் நல்ல கிரகங்கள் அமர்வது நல்லதல்ல. அவர்களால்/அவர்கள் தசையில் கெடுதல் நடக்கும்.

அவர்: ஆறில் நல்ல கிரகங்கள் இருந்தால் விபரீத ராஜ யோகமாயிற்றே! நல்லதும் நடக்க வேண்டுமே! உன் பதில் மனிதர்கள் கற்று தந்த ஜோதிட முறையாயிற்றே! அப்படித்தான் இருக்கும்!

அவர்: கேதுவானவன் ஐந்தில் இருந்தால் என்ன பலன். அதை கூறு!

நண்பர்: நிகழ்காலத்தில் நடப்பவை எல்லாம்  பூர்வ புண்ணிய பலத்தால் நடக்கும். ஐந்தாமிடம் என்பது, பூர்வ புண்ணியம், சந்தான பாக்கியம்!

அவர்: அப்பனே எவை அன்றி கூற? எப்பொழுதும் சொல்லுகின்றேன் அப்பனே! ஐந்தில், ஒன்றில் அப்பனே, பின் நவத்தில், பின் பன்னிரெண்டில் கேது இருந்தால் இவர்களுக்கு ஜாதகமே பலிக்காது என்று சொல்லிவிட்டேன். அப்படி என்றால் இது நீ எப்படி கூறினாய்?

சற்று நேர அமைதிக்குப்பின் அவரே தொடர்ந்தார்.

அப்பனே, இவர்கள் எல்லாம், கர்மத்தின் பாதையை அனுபவிப்பார்கள். இதற்கு நீ யாரிடமாவது (போயும்) கணிக்க முடியாது அப்பனே! அப்படி கணித்தாலும், (கணிப்பவருக்கு) பாபங்கள் வந்தடையும் என்பேன்.

இதற்கிடையில், நண்பர் தனது ஜாதகத்தை செல்லில் தேடினார்.

நண்பர்: "அய்யா! என் ஜாதகத்தில், கேது 12இல் இருக்கிறது அய்யா!"

அவர்: "ஹா! அப்பனே, உன்னுடைய ஜாதகமே பலிக்காது! அப்படியாயின், நீ எப்படி இன்னொருவருடைய ஜாதகத்தை பார்த்து சொல்வாய்?"

இதைக்கேட்ட நண்பர் சற்று பின் வாங்கினார்.

நண்பர்: "அய்யா! நான் இப்பொழுது தான் படிக்க தொடங்கி இருக்கிறேன்! இந்த அறிவெல்லாம் எங்களுக்கு இப்பொழுதுதான் கிடைக்கிறது. நல்லபடியாக படிக்க, என்ன செய்ய வேண்டும்?"

அவர்: "அப்பனே, நீ இப்படி படித்தால் கூட, மனிதர்கள் செப்புவித்த முறையில் தான் படிக்க கூடும். அதனால், ஒவ்வொன்றாக, ஒவ்வொரு விதத்திற்கும் யானே சொல்லித்தருகின்றேன்! அது தான் சரி, ஆனால் மனிதன் எவை என்று கூட கற்று கொடுப்பது தவறுதான் என்று யான் சொல்வேன். பெருத்த யோகம், நான்காம் திசையில்தான் நடக்கும். அவ் திசை என்ன?

அவசர பதிலாக நண்பர், "சந்திர தசை" என்றார்!

அவர்: அப்பனே! நான்காவது தசையாக ராகு தசை வந்தால், பெருத்த யோகம் நடக்கும். அவனை அடித்துக் கொள்ள யாரும் கிடையாது. அப்பனே, இவற்றையும் புரிந்து கொள்ள வேண்டும். நான்காவது தசையாக ராகுவோ, கேதுவோ, சனி அவனே வந்தால் அவந்தனுக்கு அனைத்து விடயங்களும் தெரியும் அப்பனே, என்பேன். ஆனாலும் அத்தசையில், அவன் நினைத்ததெல்லாம் நடக்காது சொல்லிவிட்டேன். இறைவன் நினைப்பது தான் நடக்கும். அப்பனே! மோட்சத்திற்கான வழிகள், இன்னும் பல வழிகள் சொல்கின்றேன் அப்பனே. ஒவ்வொரு சூட்சுமத்தை, ரகசியத்தை, எவை என்று உணர்க.

அப்பனே! சந்திரன், சுக்கிரன் ஒன்றாக இருந்தால் என்ன பலன், கூறு?

நண்பர்: "சந்திரனும் சுக்கிரனும் ஒன்றாக இருந்தாலா? என கேள்வி கேட்டுவிட்டு பதிலுக்கு தடுமாறினார்.

அவர்: "அப்பனே! இப்பொழுது கூறிவிட்டாய், தெரியாது என்பது! அது தெரியாமலே இருக்கட்டும் அப்பனே! இதுதான் ஜாதகம், தெரிந்துவிட்டதா, இப்பொழுது. அப்பனே! இதை பற்றி, நீயும் என்னை கேள்வி கேட்க வேண்டும், அதை கேள்! என்றார்.

நண்பர் இதை கேட்டதும் திகைத்துப் போனார்! எங்கேனும், தவறாக, தேவை இல்லாத கேள்வி கேட்டு விடப்போகிறார் என்று, இடையில் அடியேன் வழிமறித்தேன்! நண்பரிடம், "இருய்யா! சொல்லித்தருகிறேன்! அப்படி கேள் என்றேன்"

நண்பர் : "என் முன்னாடி எந்த ஜாதகம் வந்தாலும், என் மானசீக குருவாக, மனதுக்குள் நீங்கள் வாக்கில் நின்று கூற வேண்டும்!" என்றார்.

அவர்: "சரி! அப்பனே! அவ்வாறு நடந்தால்தான் கர்மா உன்னை அண்டாது. மற்றபடி எல்லாம் கர்மா சேர்ந்துவிடும். அப்பனே! இதில் எதை கூறுவது? இதற்கு கூட முதலிலேயே சொல்லியிருந்தால் இதற்கான பதிலை கூறியிருப்பேன். அனுபவித்து, அனுபவித்து வந்தால் தான் அனுபவங்கள் பிறக்கும் அப்பனே.

சிகப்பானவன் (செவ்வாய்) உச்சம் பெற்றால் என்ன பலன் என்று கூறு?

இத்தனை கேள்விகள் நண்பரிடம், அவர் ஜோதிஷ குரு கூட கேட்டிருக்க மாட்டார் போலும். சற்றே அசந்து போயிருந்தார். எங்கேனும் தவறுதலாக பதில் கூறிவிடப் போகிறார் என்று, உதவலாம் என்று மெதுவவக நண்பர் கேட்கும்படி கூறினேன். அதை கேட்ட அவர் "சுப்பிரமணிய யோகம்" என்றார்.

அவர்: அப்பனே! ஆனாலும், இதற்கு கூட நீ பதிலளிக்கவில்லை! சொல்லிக் கொடுத்துதான் சொல்லுகின்றாய், அதுதான் உண்மை. சிகப்பன் அவன் உச்சம் பெற்று விட்டால், முருகன் அனைத்தும் செய்வான் என்று விட்டு விட வேண்டும். இன்னும் விரிவாக கூறுகின்றேன். காத்திரு. மறு வாக்கில் இன்னும் விரிவாக அப்பனே!

நண்பர்: நாங்க படிக்கிறது எல்.கே.ஜீல. எங்ககிட்ட Ph D லெவெல்ல கேட்டா பதில் எப்படி சொல்வோம் என நொந்து கொண்டார்!

சுருக்கமாக கூறுவதென்றால், அகத்திய பெருமான் அவரின் வாக்கில்/மனதுள் நின்று ஜோதிட முறைகளை கற்றுத்தருகிறேன் என ஆசிர்வதித்தார்.

அடுத்ததாக இன்னொரு நண்பரும் அவர் மனைவியும் நாடி வாக்கு கேட்க அமர்ந்தனர்.

ஓம் ஸ்ரீ லோபாமுத்திரா சமேத அகத்தியர் திருவடிகளில் சமர்ப்பணம்!

சித்தன் அருள்.......... தொடரும்!