சித்தன் அருள் - 2362 - சித்தர் புலம்பல்கள் - 12 !

வணக்கம் அகத்தியர் அடியவர்களே!

"சித்த மார்கத்தில்" நுழைந்து கவனித்த பொழுது, பல நேரங்களில் சித்தர்கள் உதிர்த்த அறிவுரைகள், உங்கள் அனைவருக்காக!

1. உண்மையான பூஜை இறைவனிடம் அழைத்து செல்லும்.
2. சத்தியமும், தர்மமும், சிறிதளவு பக்தியும் கலந்தால் இறையை உணரலாம்.
3. உடலுக்குள் மருந்து எப்படி வேலை செய்கிறதோ, அப்படியே, இறைவனும், நீ நம்பினாலும், இல்லையென்றாலும், நவகிரகங்கள் வழி பரிபாலனம் செய்கிறார்.
4. வாசியை திருப்பி திருப்பி வாசித்தால், அதுவே பிராணாயாமம்.
5. ஒருவனின் பூர்வீக பாபங்கள் குறைந்தால் ஒழிய, வாசியோ, சாகாக்கலையோ சித்திக்காது.
6. பற்றற்ற தன்மையும், பெருந்தன்மை குணமும், என் வீடு, என் மக்கள், என் மனைவி, என் ஆஸ்தி என்கிற எண்ணம் விட்டு போகாத வரை, வாசி யோகம் யாருக்கும் சித்திக்காதப்பா!
7. அதோ வருகிறாள் என் தாய் (காரைக்கால் அம்மையார்), அதோ வருகிறான் என் தோழன் (சுந்தரர்) என சிவம் கூறியதுபோல், இறையே சுட்டிக்காட்ட வாழ்வதே சிறப்பான வாழ்க்கை.
8. வெற்று பாத்திரமாய் மனதை வைத்திருந்தால், எது சரி, எது தவறு, எது கூட வேண்டியது, எது கூடக்கூடாதது என்று இறையே உணர்த்தும்.
9. ஆன்மா லயிக்கும் இடம் ஆலயம்.
10. யார் இருளை நீக்குகிறாரோ அவர் குரு.
11. கனவிலே இறை ரூபத்தை பார்ப்பதும், எதிர்பாராத நேரத்தில் இறை ஊர்வலத்தை பார்ப்பதும், சுபசகுனம் மட்டுமல்ல, தோஷங்கள் குறைவதற்கும் நல்லதொரு வாய்ப்பை இறைவன் தந்திருக்கிறார் என்று பொருள்.
12. மந்திரங்கள் தெரியாத நிலையிலே, தவறாக உச்சரித்தாலும் இறைவன் ஒன்றும் சினம் கொள்ளமாட்டார்.
13. மௌனத்தில் ஒருவனுக்கு அனைத்துமே கிடைக்கும் என்பதால் தான், மௌனம் பழகு என்கிறோம்.
14. மனம் பேசாமல் இருப்பதே மௌனம்.
15. தினம் ஒரு ஆலயம் சென்று, மனம் ஒன்றி பிரார்த்திப்பது ஒருவன் செய்த பாபம் குறைய, நலம் செய்யும்.
16. ஏழை நோயாளிகளுக்கு மருத்துவ உதவி செய்து வந்தால், ஒருவன் இயல்பாகவே, தனக்கு வருகிற பிணியை தவிர்த்துக் கொள்ளலாம்.
17. ஆலயம் சென்று வேறெங்கோ கவனம் கொள்வதை விட, வேறெங்கோ இருந்து இறைவனை நினைப்பது சிறந்த வழிபாடு.
18. ஒருவன்/ஒருவள், கடந்தகால கவலையிலும், எதிர்கால பயத்திலும் வாழ்ந்துகொண்டு நிகழ்கால வாழ்வை இழக்க கூடாது.
19. மனம் வாக்கு காயத்தால் பிறருக்கு விளைவிக்கிற துன்பம் தான், என்றோ செய்த வினையாக எதிர்காலத்தில் மாறுகிறது.
20. மெய்யான செல்வம் என்பது புண்ணியம்தான். அதனால் தான் புண்ணியத்தை சேர்த்துக்கொள் என சித்தர்கள் உரைக்கிறார்கள்.
21. முடிந்தவரை தினமும் பைரவரை வழிபாடு செய்து, பைரவ மந்திரத்தை உருவேற்றி வந்தால் நியாயமான முறையில் கிடைக்க வேண்டிய செல்வம் ஒருவனை வந்து சேரும்.
22. பார்க்குமிடமெங்கும் நீக்கமற இறையை காண்பவன் சித்தன்.
23. யார் யார் எந்தப்பிறப்பில் எந்தெந்த மொழிகளை உச்சரிக்க வேண்டும் என்பது கூட கர்மா கணக்கில், இறைவனின் தீர்ப்பில் உள்ளதப்பா.
24. முருகனுக்கு கோபம் வந்தால் என்ன நடக்கும் என்பதை இவ்வுலகம் கண்டுள்ளது; அதே நேரத்தில் முருகன் வருத்தப்பட்டால் என்ன நடக்கும் என்று சித்தர்களுக்கே தெரியாது.
25. கலிகாலத்தில் சித்தர்களே தங்களை நிரூபித்துக் கொள்ள வேண்டி வரும், மனிதனிடம். நட்டம் சித்தர்களுக்கல்ல.
26. 100 வயதுக்கு மேற்பட்ட வேம்பு/வன்னி மரத்தின் இயல்பாக கீழே விழுந்த இலைகளை, உலர்த்தி, பொடித்து கஷாயம் செய்து அதிகாலை வெறும் வயிற்றில் அருந்த குடல் நோய்கள் விலகும்.
27. ரசாயன உணவுகளை தவிர்க்க, அல்லேல், கசப்பான மூலிகைகளை அதிகம் உண்டு, அதன் தீய பின்விளைவுகளை விலக்குக.
28. எண்ணங்கள் அற்ற நிலை என்பது, மிக மிக உயர்ந்த உன்னத நிலை ஆகும். அதுதான் மனிதனுக்கு அமைதியை தருகின்ற, மெய்யான சுகத்தை தருகின்ற ஒரு நிலை.
29. அஷ்டமி, நவமி திதி அன்று ஒரு மனிதனின் கடுமையான தோஷங்கள் வெளிப்படுமென்பதால் அந்த திதிகளில் லோகாய விஷயங்களை தவிர்த்து பைரவரை வழிபட கூறுகிறோம். இதுவே சந்திராஷ்டமத்துக்கும் பொருந்தும்.
30. இறைவனை வணங்க, காலம் தேவை இல்லை, மனப்பக்குவம் இருந்தாலே போதும்.

ஓம் ஸ்ரீ லோபாமுத்திரா சமேத அகத்தியர் திருவடிகளில் சமர்ப்பணம்!

சித்தன் அருள்.....தொடரும்!